【唔好捉鬼】捉鬼前先要理解捉鬼者心態


「唔好捉鬼」,依樣野相信依兩個星期已經有好多手足講過。但點解有人咁鍾意捉鬼?如果我地唔理解捉鬼者既心理,就無法解決依個問題。

以書生既觀察,捉鬼者有幾種。

第一種係好心做壞事。有人捉鬼,係因為真心想保護手足。佢地發覺身邊有人有可疑,就會大嗌有鬼叫手足散開,因為佢地怕鬼會突然發難,抓捕身邊既真手足。所以,對依班人黎講,捉鬼非但唔會累死勇武,反而係保護勇武既重要手段。

第二種係怕自己比鬼捉。依種人多數都係怕被捕既和理非,見到有可疑既人,就會驚慌,聯同其他身邊和理非圍住問對方係唔係鬼,希望可以靠群眾壓力屌走個鬼(警)。

第三種係真心膠,認為「裝修」同使用暴力既人都係鬼扮。真係唔係講笑,依種人其實唔少。佢地可以再細分為 3 類:

3a. 睇過真鬼裝修(譬如睇過上水站喬裝警事件段片)就認定重武力者既都係鬼;
3b. 受到自己友所謂既策略性宣傳(即係咩勇武都推落係鬼做),以致認為好多(甚至所有)裝修破壞都係鬼做;
3c. 最後一類係潛意識覺得武力抗爭係唔應該,或者認定香港人唔會真係咁「勇武」,所以覺得裝修者藏槍者好大機會係鬼,唔可以比佢地破壞和理非。

******

對於第一種捉鬼者,要同佢地講捉鬼係幫唔到勇武。因為假如你識得分,無理由假定勇武唔識分,一來勇武一定比你更小心留意身邊環境同人士,二來勇武一般有小組,識得分係唔係自己人。同埋如果對方真係鬼,比你喊叫而提早發難,可能只會累到更多手足被捕。而捉鬼最大問題係,假如你捉鬼成功,未必真係救多個手足,最多屌走佢;但你捉錯鬼,搞到勇武露左樣,就肯定累死個勇武。

對於第二種捉鬼者,其實係無必要捉鬼。因為鬼針對既對象都係真勇武,負責追縱同裡應外合圍捕勇武。和理非根本唔駛驚,擔心對方係鬼,只要行開啲就得。

至於第三種捉鬼者,係最難改變佢地觀念,因為而家有證據顯示有啲破壞真係鬼做用黎抹黑示威者暴力,故而好難分清其餘既邊啲係鬼邊啲係手足做,群眾會被部分事實混淆。但關鍵係大家有無真正既勇武意識同心理準備,去接受勇武抗爭,有的話,自然就會更願意相信部分勇武行為係手足做。

*****

我地要呼籲大家唔好捉鬼,就要對症下藥,講清楚點解唔好捉鬼。唔可以一味靠屌。好多時候人們唔會因被人罵幾句就醒。分析清楚利害關係,反而可能說服更多人。

其實嚴格來講,我地根本無「捉」過鬼,因為我地最多都只係辨認出喬裝警,今次比你「捉」到,下次都會繼續有,依樣係無可避免,畢竟係對家主要鎮壓策略。

如果真係接受到勇武抗爭,鬼做裝修,咪由佢做;鬼想捉人,勇武亦有訓練點應對。當然,未必個個勇武都可以咁好彩避開到比鬼抓捕,但關鍵係佢地對此大多有心理準備,反而痛心比自己人懷疑,甚至被迫曝光。故此,捉鬼往往得不償失,亦會破壞團結。

希望大家引以為戒。

【經營困難,贊助書生100蚊】
銀行戶口:783-279938-668,香港恆生銀行, PangChit
PayMe QRCode: https://goo.gl/jMm6pw
PayPal:paypal.me/bacchuspang
轉數快ID: 4225793

【讚好專頁,不要錯過我的好文章 ➤ 書生百用






CONVERSATION

0 意見:

Post a Comment

PHILOSOPHY

Know Thyself